Gjykata e Tiranës dënoi me 7 vite burg, ish-përgjegjësen e Kadastrës në Këshillin e Qarkut, Henrieta Hyka, e cila u gjet fajtore për falsifikimet në tjetërsimin e pronësisë së tokave në zonën e Kasharit.
Por, duke qenë se akuza e falsifikimit të dokumenteve është e parashkruar, për shkak të viteve që kanë kaluar me kërkesë të Prokurorisë, gjykata e shpalli fajtore Hykën për veprën penale të pastrimit të produkteve të veprës penale.
Shqyrtimi gjyqësor vërtetoi veprimtarinë kriminale të ish-zyrtares me qëllim përftimin me pa të drejtë për njerëzit e saj të afërm të mijëra metrave/katrorë truall në zonën e Kasharit.
Përveç falsifikimit të pronësisë së tokave, sikur ishin dhënë me ligjin 7501, falsifikimi kishte arritur deri në atë pikë, sa një sipërfaqeje prej 500 metra/katrorë truall, i është shtuar shifra 4 përpara duke e regjistruar truallin si 4500 metra/katrorë.
Me anë të këtyre falsifikimeve ajo tentoi t’u kërkonte pjesë edhe 5 firmave të cilat kanë ndërtuar pallate. Por, kjo tentativë iu kthye kundër, pasi verifikimi i dokumenteve dhe praktikave zbuloi skemën mashtruese që solli më pas nisjen e ndjekjes penale dhe dënimin e ish-përgjegjëses së Kadastrës me 7 vite burg.
Vendimi pritet të apelohet nga e dënuara, ndërsa ekzekutimi i dënimit fillon pasi vendimi të marrë formën e prerë në Gjykatën e Apelit.
*Fotoja është ilustruese
