Zbardhet dëshmia që autori i gravitjes së dy karburanteve në Vlorë dha për policinë. 27-vjeçari Mariglen Muftaraj ka thënë se arsyeja që e ka shtyrë të kryejë grabitje me armë ka qenë nevoja për lekë pasi donte të largohej në Greqi.
“Më duheshin lekë për të shkuar në Greqi”, ka thënë Muftaraj, sikurse shkruan “Panorama”. 27-vjeçari, pavarësisht se jetonte në Berat, është emër i skeduar nga Policia e qytetit bregdetar, pasi rezulton me precedentë penal për grabitje. Madje, nga Policia e Vlorës, konfirmohet se i riu vetëm pak kohë më parë është liruar nga burgu, ku vuante dënimin për grabitje, në zonën e tij në Berat. Sipas Policisë, 27-vjeçari mendohet të ketë mbërritur prej mbrëmjes së të enjtes në Vlorë, përpara se të kryente edhe dy grabitjet.
Mariglen Muftaraj, 27 vjeç, u vu në pranga pasi, i maskuar dhe i armatosur mekallashnikov, arriti të grabiste dy pika karburanti në një hark kohor prej 5 orësh.
Grabitja
Ngjarja ka ndodhur në zonën e Novoselës. Fillimisht, riu ka kryer grabitjen e karburantit brenda Novoselës, në pronësi të shtetasit Y.B., ngjarje e ndodhur rreth orës 00:40 të së premtes, ku dyshohet se ka marrë një sasi parash prej 3.000 lekë të rinj.
Ndërsa 5 orë pas kësaj, rreth orës 05:53, 27-vjeçari, pranë mbikalimit të Novoselës, në autostradën Vlorë-Fier, ka kryer dhe grabitjen e kar burantit në pronësi të shtetasit F.S.
I maskuar me kapuç në kokë dhe nën kërcënimin e armës së zjarrit automatik, ai ka marrë me forcë një sasi parash prej 24.000 lekë të rinj dhe 150 euro. Pasi ka kryer grabitjen, ai është larguar me shpejtësi nga vendi i ngjarjes, por në ndjekje janë vënë forcat e Policisë, të sinjalizuara për grabitjen e ndodhur. Ato u organizuan dhe u ndanë në grupe të posaçme për t’u shpërndarë në terren, gjë e cila solli arrestimin e tij brenda një kohe të shkurtër.
I riu u kap teksa tentonte që të fshihej mes shkurreve në një zonë mes fshatrave Aliba-Akërni. Në momentin e prangosjes, Policia ka sekuestruar dhe armën tip kallashnikov si dhe paratë që kishte grabitur. Në momentin e arrestimit, 27-vjeçari mbante ende kapuçin në kokë, ndërsa armën e kishte hedhur disa metra larg. Gjatë marrjes në pyetje nga grupi hetimor që po punon për zbardhjen e rrethanave të të dyja grabitjeve, ai ka deklaruar se ishte detyruar t’i kryente ato për të siguruar para për të emigruar në Greqi. Fakti që në grabitjen e parë ka dalë duarbosh, pasi ka arritur të marrë vetëm 3 mijë lekë të rinj, ka “detyruar” atë që të kryejë një tjetër grabitje.
