Kryeministri Edi Rama po zhvillon pasditen e sotme një takim me gratë dhe vajzat në Dibër, në kuadër të fushatës për zgjedhjet e 11 majit.
Në këtë takim, Rama u përball me një slogan ku shkruhej “4 me 1 s’ka bo vaki, nga Burreli në Peshkopi”.
Kreu i qeverisë u shpreh i bindur se më 12 maj Dibra do gdhihet rozë, ndërsa u shpreh se fuqia e PS është gruaja dhe vajzave. Kryesocialisti nuk i la as në këtë takim ironitë për burrat shqiptarë, ku u shpreh se gjysma e tyre janë normal dhe gjysma tjetër janë çyrykë.
Pjesë nga fjala e Edi Ramës:
“Sot kur sapo hyra më është kujtuar takimi i parë në PS e Dibrës. Takimi i parë në PS e Dibrës, gjithë burra, mbyllur në një si strofull. Njëri hudh, tjetri kap, nuk merrja vesh ca thoshin dhe as me kë e kishin as ku donin të dilnin, por një gjë e kuptova që më budallai aty isha unë. Sot para se të vinim ishim ulur aty dhe i thashë Astrit Ademit, ti asnjëherë nuk e ke besuar se PS këtu nëse nuk i nxjerr gratë nga shtëpitë që ti japë komandën dhe nëse këtu nuk e marrin gratë dibrane komandën nuk fiton kurrë. Sot faktikisht gjithë kjo pamje që ishte e paimagjinueshme 10 vjet më parë është pamja e fitores tonë.
4 me 1 ska bo vaki nga Burreli në Peshkopi. Mendoj se kjo do realizohet. Ajo që është e rëndësishme 4 apo 3 në 11 maj Dibra do votojë aty ku duhet dhe më 12 maj do gdhihet rozë. Sepse Dibra është grua, Shqipëria është grua, edhe Evropa është grua.
Mua nuk ka gjë tjetër që më bën krenar sesa fakti sesa kjo forcë themelin më të madh ka gratë dhe vajzat në të gjithë Shqipërinë. Në gjithë Shqipërinë PS e mbështesin 56% e grave dhe vajzave. Ka disa qarqe që shkon 65%, Dibra është rreth 60%.
Nëse ne kemi 60% të grave dhe vajzave, nëse ne kemi shumicën e votuesve të parë, na mjafton vetëm gjysma e burrave, sepse kjo jetë këtu në këtë vend më ka mësuar që gjysma e burrave janë normal, gjysma tjetër janë çyrykë.”
