Gjyqtari i Apelit të Tiranës, Gjin Gjoni ka dorëzuar dorëheqjen e tij nga detyra e gjyqtarit dhe anëtarit të Kolegjit Zgjedhor.
Në shkresën e siguruar nga Opinion.al, që Gjoni ka paraqitur në KLGJ, ai shkruan se procesi i vetingut nuk është i barabartë për të gjithë.
“Prej kohësh sistemi i drejtësisë është në kolaps, lëvizjet dhe sita e vetingut nuk ka të njejtët parametra dhe as kritere të barabarta për të gjithë, nëse je shërbëtor i politikës, nëse vulos dhe firmos pa menduar, pa lexuar dhe pa ju nënshtruar ligjit dhe kushtetutës e kalon, nëse je shpallur më parë armik i partisë nuk shihesh me sy të mirë dhe përfundon në rrugë.”, shkruan Gjoni.
Ai shton më tej se është sulmuar se nuk pranoi ti nënshtrohej pushtetit dhe partive.
Gjyqtari i Apelit të Tiranës kritikon gjithashtu trupën e vetingut duke shkruar se “lë shumë për të dëshiruar, si në aspektin profesional, në formimin e përgjithshëm dhe lidhjet me politikën”.
Gjyqtari Gjin Gjoni pritej t’i nënshtrohej procesit të vetingut. Por ai siguroi një leje prindërore 2-vjeçare për t’i qëndruar pranë gruas së tij në Gjermani. Kjo solli edhe reagim ndërkombëtar sipas të cilëve një gjë e tillë nuk mund të pengonte vetingun ndaj tij.
Me dorëheqjen e sotme ai i shmanget këtij procesi megjithatë pritet një përgjigje nga ana e KLGJ-së. /Opinion.al
