Francesco Becchetti rrëzohet përseri nga gjykatat shqiptare. Këtë herë Gjykata e Lartë nuk ka pranuar të shqyrtojë kërkesën e avokatëve të biznesmenin italian për ndryshimin e masave të sigurisë.
Në këtë mënyrë, për 49-vjeçarin së bashku me bashkëpunëtorin e tij Mauro De Renzis, mbetet në fuqi masa e arrestit me burg, marrë nga Gjykata e Shkallës së Parë në qershor të këtij viti dhe rikonfirmuar në korrik nga Apeli i Tiranës.
Kërkesa e avokatëve është bërë në datën 3 dhjetor, pasi Becchettit i ishte bllokuar pasaporta në Londër, por Kolegji Penal nuk e ka pranuar atë.
Francesco Becchetti është shpallur në kërkim nga autoritet shqiptare për katër vepra penale: si pastrim parash, krijim të skemave mashtruese, vjedhje duke shpërdoruar detyrën si dhe falsifikim të dokumentave.
Në fund të nëntorit, Becchetti u ndalua nga autoritetet britanike në Londër, sipas urdhërarrestit ndërkombetar të nxjerrë nga Interpol Tirana.
Autoritetet i kanë lënë afat per t’u kthyer vullnetarisht në Shqipëri, duke e paralajmëruar se në të kundert do të nisin proçedurat e ekstradimit me forcë. Por Becchetti e ka çuar në gjykatë në Londër, këtë kërkesë, në përpjekje për t’a shmangur ekstradimin.
