Autoritetet gjermane ka deklaruar se analizat e pavarura të dy laboratorëve në Francë dhe Suedi kanë konfirmuar se lideri opozitar rus, Aleksei Navalny është helmuar me agjent nervor të grupit Noviçok.
“Tre laboratorë ndaras kanë ofruar të dhëna të agjentit nervor, të grupit Noviçok, si shkas për helmimin e Navalnyt. Ne i bëjmë thirrje Rusisë që të sqarojë çfarë ka ndodhur. Ne jemi në kontakt të ngushtë me partnerët evropianë për hapat e ardhshëm”, ka thënë qeveria gjermane përmes një deklarate më 14 shtator.
Kritiku i Kremlinit, u sëmur gjatë një fluturimi nga Siberia në Moskë më 20 gusht. Me kërkesë të gruas së tij, ai u dërgua për trajtim në Gjermani.
Ekspertët gjermanë deklaruan se 44-vjeçari, është helmuar me agjent nervor të kategorisë ushtarake. Menjëherë pas konstatimeve, liderët botërorë i kërkuan Rusisë që të hetonte rastin. Nga ana e tyre, autoritetet ruse kanë refuzuar hapjen e ndonjë hetimi penal, duke thënë se nuk kanë të dhëna zyrtare për shenja të helmimit.
Sekretari amerikan i Shtetit, Mike Pompeo ka thënë më 10 shtator se ka mundësi që helmimi është udhëruar nga zyrtarë të lartë të Moskës, ndërsa ekipi i Navalnyt, të afërmit dhe mbështetësit e tij besojnë se autoritetet ruse qëndrojnë pas sulmit.
