Thomas Kemmerich, kryetari i sapozgjedhur i landit gjerman, Turingen me ndihmën e partisë të së djathtës ekstreme, Alternativa për Gjermaninë është shprehur se do të japë dorëheqje për t’i hapur rrugë procesit të ri zgjedhor. “Dorëheqja është e pashmangshme”, -ka thënë ai.
Zgjedhja e Kemmerichut ka nxitur reagime të ashpra, ndërsa kancelarja gjermane, Angela Merkel ka thënë se fitorja e tij është e “pafalshme” dhe se procesi duhet të pezullohet.
Kemmerich u ka thënë gazetarëve të enjten se partia e tij e Demokratëve të Lirë, ka bërë kërkesë për shpërndarje të parlamentit në Erfurt.
“Ne duam zgjedhje të reja, për të larguar shenjat e mbështetjes së partisë, Alternativa për Gjermaninë në zyrën e kryetarit”, -ka thënë ai.
Votimi i së mërkurës është përshkruar si tërmet politik në Gjermani, pasi partitë e mëdha kanë refuzuar në të kaluarën të bëjnë marrëveshje me këtë parti.
Duke folur gjatë një vizitë në Afrikën Jugore, kancelarja Merkel ka thënë se zgjedhjet ne Turingen duhet të zhvillohen sërish.
“Ka qenë ditë e keqe për demokracinë, një ditë që ka thyer traditën e gjatë dhe krenare të vlerave të Partisë Demokristiane (CDU). Kjo nuk ka të bëjë aspak me atë që beson CDU-ja”,– ka deklaruar ajo.
Shumë politikanë tjerë kanë bërë thirrje për dorëheqjen e Kemmerichut nga pozicioni që ka fituar, përfshirë kryetaren e partisë CDU, Annegret Kramp-Karrenbauer.
Kritikët e Kemmerich-ut kanë qenë të shokuar me faktin se dy partitë e qendrës së djathtë kanë bërë marrëveshje me partinë që ka qasje ekstreme ndaj emigrimit, lirisë së shprehjes dhe shtypit.
Partia Alternativa për Gjermaninë ka ligjvënës në të 16 parlamentet e landeve gjermane.
Në nivel kombëtar ajo mban 89 vende në Dhomën e Ulët të parlamentit nga 709 në total, duke e bërë atë partinë më të madhe opozitare./Opinion.al/
