32-vjeçari, Lear Kurti, i cili gjeti vdekjen pas shoqërimit nga policia në komisariatin numër 3 dyshohet se ka humbur jetën si pasojë e mbidozës së kokainës.
Burime për Klan News bëjnë të ditur se në stomakun e të riut është gjetur një përmbajtje plastike, ku dyshohet se kishte lëndë narkotike, kokainë.
Dyshohet se qesen e kokainës ai e ka gëlltitur për të mos ia kapur policia.
Kujtojmë se policia mbrëmjen e djeshme i bëri thirrje të riut për të ndaluar por ky i fundit u largua me vrap. Punonjësit e policisë janë vënë në ndjekje të tij dhe kanë arritur ta ndalojnë në rrugën “Don Bosko”, duke kryer më pas edhe shoqërimin e tij në ambientet e Komisariatit të Policisë Nr. 3 në Tiranë.
Gjatë shoqërimit, i riu ka shfaqur probleme shëndetësore. Ndërkohë që sipas Agjencisë të Mbikqyrjes policore menjëherë më pas 32-vjeçari është dërguar me mjetet e Policisë në Spitalin e Traumës, ku edhe ka ndërruar jetë.
Por kjo deklaratë e Agjencisë të Mbikqyrjes policore bie ndesh me atë të Spitalit të Traumës. Spitali i Traumës bën me dije se i riu ishte paraqitur në spital pa shenja jete.
