Sekretari i Partisë Demokratike Gazment Bardhi reagoi pas akuzave ndaj tij dhe kryetarit të PD-së Lulzim Basha për situatën e krijuar brenda kampit blu me organizimin e dy kuvendeve dhe akuzat që PD po ofendon demokratët duke mos pranuar firmat e mbledhura për 11 dhjetorin. Ndërkohë disa ditë më parë kreu i PD, Lulzim Basha, u akuzua se i kishte quajtur “llum” anëtarët e PD-së që mbështesin “Foltoren” e Berishës .
Në një postim në rrjetin social “ Facebook”, Bardhi iu drejtohet demokratëve duke u kujtuar se personat që po sulmojnë aktualisht Bashën dhe mbështetësit e tij janë të njëjtët njerëz që kanë abuzuar me pushtetin gjatë periudhave të qeverisjeve të PD-së, dhe që kanë menduar për mirëqënien dhe pasurinë e tyre.
Më tej Bardhi shkruan se kjo kategori nxit përçarjen mes demokratëve, ndërsa thotë se të bashkuar PD do të ringrihet dhe do të fitojë.
Postimi i plotë i Gazment Bardhit:
Pas sajesave të ulëta ndaj Kryetarit të PD për gjoja fyerje ndaj anëtarëve të Partisë, prej disa ditëve kanë nisur të njëjtat sajesa ndaj meje, duke më vënë në gojë fjalë që nuk i kam thënë dhe nuk do t’i thoja kurrë për demokratët. Deklaratat e mia janë publike dhe në të njëjtin lajm të sajuar keq, kushdo mund të dëgjojë çfarë kam thënë për të kuptuar që titulli i lajmit është thjesht një gënjeshtër.
Transformimi i të vërtetave është tregues i hallit të madh të atyre që po mundohen të keqpërdorin demokratët, pamundësinë e tyre për një jetë më të mirë, sakrificën e përditshme dhe dëshpërimin nga pengesa për ndryshim.
Këtë e bëjnë të njëjtët individë që anëtarët e partisë dhe votuesit e Partisë Demokratike i kanë parë vetëm si mundësi për pushtet personal, për të shtuar mirëqenien dhe pasurinë e tyre. Janë të njëjtët që demokratët e vërtetë, që kanë sakrifikuar për PD pa marrë kurrë asgjë në këmbim, i kanë lënë prej 30 viteve pas derës, në varfëri ekstreme, që nuk iu gjendën kurrë, kur kishin një problem, që i lanë pa ua legalizuar shtëpitë, pa u dhënë hipotekën e banesës, pa u dhënë dëmshpërblimin e ish-të përndjekurve, pa u kthyer pronat, që i sillnin vërdallë me muaj apo vite për një vend pune.
Kjo kategori është më e zjarrta për nxitjen e perçarjes mes demokratëve. Jam i bindur se mes nesh nuk do të triumfojë dëshpërimi, hakmarrja, inatet, përçarja. Në 18 dhjetor ne do të tregojmë se kemi kurajo për të kapërcyer bashkë vështirësitë dhe mosbesimin! Të bashkuar do të ringrihemin dhe do të fitojmë!/Opinion.al
