Një tjetër gazetare është dhunuar nga punonjës të Gardës së Republikës. Vetë gazetarja e Tv Klan , Ola Xama shkruan në profilin e saj në facebook se punonjës i Gardës se Republikës e ka dhunuar verbalisht dhe fizikisht ndërsa ishte në krye të detyrës për të ndjekur punimet në Komisionin e Ekonomisë.
“Kameramanët dhe më shumë se 10 kolegë të mi ishim duke pritur jashtë, në korridorin e Kryesisë se Kuvendit, për të pyetur Guvernatorin e Bankës se Shqipërisë lidhur me ngjarjen e grabitjes se Aeroportit te Tiranës. Personi qe shihni në foto, me kapi forcërisht krahun dhe me tërhoqi, kur unë nuk e kisha mendjen, me arsyetimin se po pengoja rrugën. Askush, as policia, as Garda e Republikës, as Kryetari i Kuvendit, nuk ka te drejte te preke askënd me dorë, dhe jo më të dhunoje! Ai mund te me kërkojë me mirësjellje të largohem, por jo të më prekë me dorë!”, shkruan gazetarja.
Pak kohë me parë një tjetër gazetar, i Klan Plus u dhunua nga truproja e prokurores së Përgjithshme të Përkohshme. Por siç ndodh në Shqipëri askush nuk merr masa për raste të tilla, deri sa shumëkush flet pas raporteve të organizatave ndërkombëtare për lirinë e medias në Shqipëri. /Opinion.al
