Elseid Hysaj është mbrojtësi më i mirë i djathtë në Serie A, për pjesën e parë të sezonit. Shqiptari i Napoli u rendit i pari në anketën e faqes së specializuar të merkatos Calciomercato.com. Triumfi në këtë garë virtuale u arrit duke marrë 42% të votave.
Hysaj la pas Florenzi e Roma, Bruno Peres të Torino dhe Vrsaljko të Sassuolo. Një vlerësim që reflekton paraqitjen e deritanishme të mbrojtësit të Kombëtares, i cili është një titullar në formacionin e Mauricio Sarri.
Pa frikë, afrimi i Elseid Hysaj te Napoli është një bast i fituar dhe besimi duket edhe te kontrata e tij, që përfundon në vitin 2020. Sipas Transfermarkt.com, vlera e kartonit të 21 – vjeçarit është rritur përsëri dhe tani kushton 7,5 milionë euro.
Në faqen Calciomercato.com po vijon votimi për pozicionet e tjera, për të përcaktuar formacionin ideal të pjesës së parë të sezonit, ku në portë është Handanovic dhe në krahun e djathtë shqiptari Hysaj.
