Vendet evropiane, që kanë nënshkruar marrëveshjen bërthamore me Iranin, i kanë bërë thirrje Teheranit të tërhiqet nga vendimet e fundit për të rritur nivelin e uraniumit të pasuruar.
Në një deklaratë të përbashkët, Gjermania, Britania, Franca dhe Bashkimi Evropian shprehën “shqetësim të thellë se Irani nuk po përmbush disa nga angazhimet e tij, sipas marrëveshjes bërthamore të vitit 2015”.
Nënshkruesit evropianë të marrëveshjes, u bën thirrje gjithashtu të gjitha palëve “të veprojnë me përgjegjësi drejt uljes së tensioneve të vazhdueshme”.
Kujtojmë se me marrëveshjen e vitit 2015, Irani ka kufizuar aktivitetin bërthamor në këmbim të lehtësimit të sanksioneve ndërkombëtare por më 8 korrik njoftoi se kishte pasuruar uraniumin, përtej nivelit të pastërtisë prej 3.67 për qind, të lejuar sipas marrëveshjes, duke kaluar nivelin 4.5 për qind.
Nga ana tjetër tensionet mes Iranit dhe SHBA-së janë rritur ndjeshëm prej majit të vitit të kaluar, kur presidenti amerikan, Donald Trump, u tërhoq nga marrëveshja duke thënë se kushtet e saj nuk ka kanë qenë të ashpra mjaftueshëm, sa për ta penguar Iranin nga krijimi i armës bërthamore. Që atëherë, SHBA-ja ka rikthyer sanksionet kundër Iranit./Opinion.al
