Shefi i Sektorit të Garave në FSHF, Lysjen Nurishmi, gjithashtu delegeti zyrtar i kësaj ndeshjeje ka reaguar në lidhje me incidentin e mbrëmshëm në “Elbasan Arena” në ndeshjen Partizani-Skëndërbeu, ku ai fajëson policinë dhe klubet në lidhjë me situatën që u krijua. Ai shprehet se mungesa e koordinimit solli një situatë të keqe me pasoja të rënda për imazhin e futbollit në vendit otnë, ndërkohë pranon se federata e anashkalon rregulloren duke i lejuar klubet në garë pa oficer sigurie.
“Duhet të ketë një koordinim, pra edhe policia në rastet kur vepron, do të ishte mirë që përpara veprimeve të kishte një mini-mbledhje me zyrtarët e ndeshjeve dhe me klubin, për të marrë masa në rastet kur situata del jashtë kontrollit. Me rregullore, në rastet kur tifozët nuk qetësohen ose vazhdojnë veprimet e dhunshme, gjyqtari ndërpret lojën deri sa ai sektor i tribunës të zbrazet. Kështu shmangen incidentet dhe imazhet jo të mira për futbollin shqiptar”
Ai pranon se FSHF nuk ka pasur asnjë lloj ndërhyrje në menaxhimin e forcave të rendit gjatë ndeshjes dhe se kishte komunikuar me to, vetëm pas përfundimit të ndeshjes shumë të tensionuar midis Partizanit dhe Skëndërbeut.
“Ishte ndeshje me tension. Kishte incidente në fillim të ndeshjes jashtë stadiumit, ndërsa të dyja tifozeritë ofenduan gjatë gjithë kohës. Me anë të sistemit audio të stadiumit bëmë thirrje disa herë që kjo të ndalonte. Kishte edhe hedhje te mjeteve pirroteknike.Deri në minutën e 82-të, kur në ishim të fokusuar te faulli i shkaktuar nga Vangjeli, shikojmë që disa persona po hynin në stadium me një vajzë që ishte në gjendje jo të mirë shëndetësore, ndërsa më pas pamë që policia kishte ndërhyrë te ai sektor ku ishin tifozët ultras të Partizanit. Në ato momente ishte e vështirë të komunikonim me policinë, ndërsa më pas biseduam me drejtorin e policisë së qarkut të Elbasanit. Versioni i policisë ishte që ata ishin goditur nga tifozët e Partizanit në atë sektor dhe për këtë arsye reaguan. Situata doli jashtë kontrollit. Duke parë që ai sektor ishte i mbipopulluar dhe njerëzit ishin në panik, policia e pa të arsyeshme që ato 2-3 persona të dëmtuar t’i nxirrte nga dyert e emergjencës, për t’i dërguar pranë ambulancës që ndodhej në afërsi të fushës. Në sytë e imazhit, pra në kamera, nuk është një shfaqe e bukur. Por, ky ishte rasti i parë dhe është një mësim si për ne, ashtu edhe për klubet”, tha Nurishmi për “SuperSport”.
