“Situatën e Ismail Morinës, Federata Shqiptare e Futbollit po e ndjek me shumë kujdes. Po ndjekim të gjithë hapat e nevojshme që kjo çështje të ketë zgjidhje pozitive dhe të shpejtë”. Kështu deklaroi sot Denis Bastari drejtor i administratës në FSHF.
“Presidenti Duka është në komunikim me kryeministrin Edi Rama, i cili ka kontaktuar me homologun e tij kroat mbi këtë çështje”, tha më tej zyrtari i FSHF-së
Denis Bastari theksoi gjithashtu se FSHF ka marrë garancinë nga kryeministri Edi Rama për përpjekjet e tij deri në zgjidhjen përfundimtare të çështjes së Ismail Morinës: “Kryeministri ka garantuar Presidentin Duka se është duke bërë përpjekjet maksimale që Ismail Morina të lirohet sa më shpejt të jetë e mundur”.
Për të mos lejuar që Serbia të ekstradojë nga Kroacia Ismail Morinën (Ballstin) është bërë kërkesë zyrtare edhe nga Ministri i Drejtësisë, Gazment Bardhi.
