Përmes një lidhjeje live në Facebook, kryeministri Edi Rama ka lexuar një vendim të një prokuroreje që sipas tij është skandaloz.
Bëhet fjalë për mos fillimin e hetimeve ndaj një personi, që sipas kreut të qeverisë ka ndërtuar m’u në mes të Thethit, një fshat turistik pa leje.
“Duke qenë se kërkova të kuptoj më shumë, u ndesha me një vendim të një prokuroreje, zonja Gjeli, që më la pa fjalë. E ndava vendimin me disa të tjerë për të kuptuar se çfarë nuk arrija dot të kuptoja unë, por edhe reagimi i të tjerëve ishte pa fjalë. Po ju lexoj se si arsyeton zonja Gjeli, prokurore në Shqipëri, nga trupa e shumë mirëpaguar me taksat e shqiptarëve e cila në vend të mbrojë pasuritë e përbashkëta të këtij populli nga individë si ai që ka plagosur Thethin., në cenim total të çdo lloj norme të bashkëjetesës në këtë vend dhe shkelje flagrante të një sërë ligjesh, pasi aty është zonë e mbrojtur. Ja se ç’arsyeton zonja Gjeli…
Në lidhje me subjektin aktiv të veprës penale vlerësohet se në rastin konkret plotësohet ky element, ku Kodi Penal parashikon se ka përgjegjësi penale personi që në kohën e kryerjes së një krimi ka mbushur 14 vjeç. Absurdi, sapo ka filluar dhe unë po shkëpus vetëm një pjesë se janë një sërë çarçafësh. Sa i përket anës subjective të kësaj figure krimi, ky element lidhet me qëndrimin psikik që mban personi kundrejt veprës së kryer prej tyre. Ana subjektive karakterizohet nga faji, që na e shpjegon dhe latinisht, në dy format e tij, dashjen dhe pakujdesinë. Si dhe nga motivet e qëllimet“, lexoi për ndjekësit kreu i qeverisë, pas vizitës së tij në qytetin bregdetar të Vlorës.
Teksa paralajmëron se çështjen në fjalë do e çojë deri në Këshillin e Lartë të Prokurorisë (KLP), theksoi se do të merren masa për çdo prokuror në Republikën e Shqipërisë që merr vendime të tilla në përgjigje të krimeve mjedisore.
“Është e pabesueshme, deri në kufijtë e të llahtarshmes, që një prokurore që para trajtimit të një krimi mjedisor, ndaj pronës publike, të një krimi ndaj një zone ligjërisht të mbrojtur, të jetë në një jerm si ai që lexova që është pjesëz e një përroi psikik të pashtershëm në formë vendimi për mosfillim të çështjes penale”, deklaroi Rama.
