Një ngjarje e rëndë ka ndodhur në Francë, ku një 13-vjeçare shqiptare ka ndërruar jetë pasi ka rënë nga kati i pestë në një pallat në Ban-Saint-Martin Moselle.
Mediat franceze raportojnë se ngjarja ka ndodhur ditën e shtunë më datë 26 nëntor. Për rastin ka reaguar edhe kryebashkiaku Henri Hasser. “Është një tragjedi” ka thënë ai.
Vajza ishte studente në Kolegjin Jean-Bauchez. Në një intervistë për Lorraine Actu, Hasser ka thënë se adoleshentja ishte fëmija më i madh i një familjeje me origjinë shqiptare, fëmijët e së cilës janë të gjithë të arsimuar në qytet. “Motra e saj e vogël është në klasën e gjashtë në kolegj dhe dy të fundit studiojnë bashkë në shkollën Pagnol”, detajon kryebashkiaku i Ban-Saint-Martin.
Henri Hasser përshkruan një vajzë të re “e cila ishte drejtuese e klasës së saj dhe që ishte madje ajo që përfaqësonte të gjithë delegatët e kolegjit”. Kryetari i bashkisë e përshkroi adoleshenten si “një fëmijë të fortë dhe dinamik”.
