Takimi i djeshëm mes kombëtareve shpresa të Greqisë dhe asaj të Shipërisë, përveçse ka sjellë humbjen 21 për ekipin kuqezi në minutën e 90, është shoqëruar me shumë tension, madje deri në përplasje fizike mes lojtarëve. Gjithçka filloi në minutën e 43-të kur akordohet një penallti për vendasit.
Mbrojtësi Shkalla shtyn një nga kundërshtarët, i cili bie në tokë dhe kryesori i takimit nuk mendohet dy herë, por nxjerr nga fusha mbrojtësin, i cili lë me një lojtar më pak ekipin.
Mes lojtarëve të dy ekipeve ka shtyrje, por për pak minuta rikthehet sërish qetësia. Tension ka edhe në fundin e takimit, ku Manaj bën një ndërhyrje të rëndë ndaj një kundërshtari dhe nis sërish konfrontimi mes lojtarëve, por edhe këtë radhë gjithçka u mbyll në pak minuta.
Kalimi në avantazh me anë të Latifit u dha shpresa kuqezinjve për një rezultat pozitiv në Greqi, por penalltia dhe dalja me të kuqe e Shkallës në pjesën e parë si dhe goli i pësuar në minutën e 90 që përmbysi rezultatin, ka bërë që futbollistët shqiptarë të tradhtohen nga nervat. Fotot e mëposhtme tregojnë edhe momentet e tensionit në derbin ballkanik./panorama/
