Fotot e mëposhtme janë marrë nga ndeshja Sportingu i Tiranës-Bulqiza, e vlefshme për Kategorinë e Tretë të futbollit shqiptar, ku në minutën e ’43 të Pjesës së Parë, tifozët bulqizakë zbritën në fushën sportive të Kompleksit të Kamzës dhe dhunuan më mënyrën më barbare futbollistët e Sportingut.
Loja ka nisur normalisht dhe kanë qenë bulqizakët që kanë shënuar tre gola, me Ermal Rizvanin, Likën dhe Domin. Në minutën e 41-të, Gjoka i Sportingut i ndërhyn keq kapitenit të Bulqizës, Ermal Rizvani, dhe mes lojtarëve ka replika e sharje banale. I pari që afrohet për t’i ndarë është portieri i Sportingut, Çeliku, në një kohë që vijnë edhe lojtarë të tjerë të të dy ekipeve për të qetësuar situatën.
Në këtë moment, nga shkallët zbresin në fushë disa tifozë bulqizakë dhe nisin të godasin lojtarët e Sportingut. Kapiteni i skuadrës kryeqytetase, Elvis Shkurta, ndërhyn për të qetësuar gjakrat, por një nga tifozët e ka goditur me grushte pas koke, duke e lënë në fushë pa ndjenja.
Ndërsa dy tifozë të tjerë kanë goditur me grushte në ballë edhe lojtarin tjetër të Sportingut, Nadir Çela, duke i shkaktuar çarje. Në këtë situatë janë përfshirë edhe lojtarët e tjerë të dy ekipeve duke shkëmbyer grushte dhe shkelma mes tyre. Është dashur ndërhyrja e forcave të rendit që t’i qetë- sonte disi gjakrat.
Në këto momente ndërhyn mjeku i Sportingut, Edison Koçi. Fillimisht ai ka përmendur kapitenin Shkurta që ka qëndruar në atë gjendje për rreth 4 minuta. Në të njëjtën kohë, ai i ka dhënë ndihmën e parë edhe të gjakosurit Çela, si dhe të plagosurit tjetër në sy, Ani Musliu. Ndërhyrja e shpejtë e mjekut bëri që të mjekonte lojtarët e dëmtuar dhe duke shmangur ndonjë tragjedi të mundshme.
Rreth 25 minuta ka zgjatur e gjithë ngjarja, nga momenti i përplasjes së parë në fushë mes lojtarëve deri në normalizimin e situatës. Katër gjyqtarët e ndeshjes kanë vendosur të ndërpritet takimi. Kryesori Zharkalli u ka komunikuar dy kapitenëve të skuadrave, Elvis Shkurta dhe Ermal Rizvani, se me këtë situatë të krijuar ishte e pamundur që të vazhdonte ndeshjen duke e ndërprerë atë. Është një prej rasteve të shumta gjatë sezonit të fundit në Kategorinë e Tretë ku ndodhin sherre masive dhe përplasje në fushë. Dhe, në shumë raste, shkaktarët janë tifozët, ashtu siç ndodhi edhe dje. Mungesa e kushteve për të garantuar që askush të mos hyjë në fushë dhe fakti që ka pak forca policore krijon mundësinë që ngjarje të tilla të ndodhin shpesh.
