Lionel Mesi bëhet përsëri protagonist me Argjentinën, por këtë radhë në konferencën për shtyp më të veçantë të kësaj kombëtareje futbolli. “Pleshti” ka udhëhequr shokët e skuadrës para gazetarëve dhe aty me mikrofon në dorë ka folur vetëm ai, duke shpallur “heshtjen për shtyp”.
Shkak janë bërë shkrimet e ditëve të kaluara në mediat argjentinase sipas të cilave Ezekuiel Laveci ishte përjashtuar nga ndeshja e Argjentinës me Kolumbinë pasi kishte përdorur marijuanë gjatë grumbullimit.
Fillimisht ishte vetë Laveci i cili nëpërmjet një mesazhi në Twitter kishte lënë të kuptohej se do t’i drejtohej rrugëve ligjore për të mbrojtur emrin e tij, por më pas, të 26 lojtarët e grumbulluar nga Argjentina, u vunë në rresht pas Mesit dhe treguan qëndrimin e tyre të bashkuar para gazetarëve.
“Akuzat janë shumë të rënda. Nëse nuk do të flasim tani, nuk do ta bëjmë më kurrë. Preferojmë që të përballemi kështu me çështjen, në vend që me një komunikatë të ftohtë. Ne nuk duam të marrim pjesë në këtë lojë. Kemi marrë vendimin që të mos flasim më me shtypin.
E dini përse. Kemi marrë shumë akuza dhe mungesë respekti por ajo ndaj Lavecit ishte shumë e rëndë. Mund të na thoni që luajmë mirë apo më pak, por është shumë e rëndë që të futesh kështu në jetën e një lojtari”, ishin fjalët e Mesit para se të largohej bashkë me shokët e tij nga salla e konferencave.
