Gazetarët e mediave shqiptare përballë Kryeministrisë, përreth dy orë, në pritje të mbarojë takimi mes kreut të Kuvendit, Ilir Meta dhe kryeministrit Rama.
Takimi i dy aleatëve të koalicionit qeverisës vjen një ditë para zhvillimit të seancës parlamentare, ku pritet të kalojë dhe ligji për importin e mbetjeve urbane.
Gjithashtu, Rama ka deklaruar pak ditë më parë se pret që të takohet me Metën për të vendosur dhe për të ardhmen e koalicionit.
Kurse, kreu i LSI-së duke folur nga Shkodra tha se ai do t’i qëndrojë marrëveshjes së firmosur më 1 prill të vitit 2013.
Takimi në Kryeministri është paksa “i pazakontë” pasi zakonisht takimet e Ramës dhe Metës janë zhvilluar kryesisht në Kryesinë e Kuvendit.
