“Ike u harrove”. Duket se kjo shprehje e vjetër popullore merr kuptimin e saj të parë në varrezat e kryeqytetit, ku të vdekurit vërtet janë harruar. Nëse në konceptin kulturor, veç anës shpirtërore varrezat konsiderohen edhe simbol qytetërimi, duket se në varrezat e kryeqytetit, asnjëri nga konceptet nuk është ekzistent.
Mjafton të shihen fotot e mëposhtme të realizuara vetëm dy ditë më parë, për të kuptuar se të vdekurit në kryeqytet, ne varrezat e Sharres janë lënë në harresë, aq sa një pjesë e varreve janë zhdukur, mbuluar nga bari i lartë dhe i dendur duke bërë kështu, që personat që shkojnë për të nderuar të afërmit, të kenë vështirësi në gjetjen e varreve të tyre.
Për më tepër, bari kaq i dendur krijon mundësinë e strehimit të zvarranikëve të rrezikshëm, ndërkohë që familjarët paguajnë privatisht persona të kujdesen për varret e të dashurve të tyre.
Fotot që po ju sjellim, janë shkëputur nga FB Ina Koxha, e cila, jo më larg se dje shkruan:
“E dashur gjyshe! Erdha sot të sillja një tufë me lule, por më doli gjarpri”. Për opinion.al, Ina tregon se i ka hedhur lulet dhe është larguar me vrap, për t’i shpëtuar zvarranikut të frikshëm që ka parë pak metra më tej, duke mos mundur t’i beje nderimet e duhura gjyshes se dashur.
