Policia italiane ka goditur një bandë kriminelësh të cilët ishin kthyer në makthin e tregtarëve dhe biznesmenëve në zonën e Riminit, duke shënuar grabitje të shumta dhe plaçkitje në muajt janar dhe shkurt të këtij viti.
Sipas mediave italiane, operacioni i koduar me emrin T Max, ka çuar në 7 urdhër arreste kundër dy shqiptarëve, dy nordikëve, një italian, një maqedonas, një ukrainas.
Në pranga kanë rënë Fatjon Vata, 20 vjeçari shqiptar që besohet se ishte kapoja i bandës, Bardhok Sokoli, 21 vjeçari tjetër shqiptar që është kushëriri i të parit, Valentino dhe Devad Ahmetoviç, Refik Karpuzi, 22 vjeçar maqedonas, Maksym Veres, dhe kuzhinieri nga Rimini Gino Alberto Melis.
Gjithçka nisi më 20 janar, kur pjesëtarët e bandës së krijuar nga dy shqiptarët në Rimini, kishte nisur grabitjet e armatosura kundër dyqaneve që shisnin produkte për cigare, stacionet e gazit, motoristëve që shpërndanin pica në shtëpi dhe dyqaneve.
Të gjitha lëvizjet, banda i kryente duke përdorur motorrë skuter “Yamaha”. Plaçkitjet bëheshin sipas policisë, me qëllim që banda të siguronte të ardhura për një jetë më të mirë, duke përfshirë përdorimin e kokainës dhe aventurave me prostituta. Më 12 shkurt, pas një ndjekjeje nëpër rrugë, policia ka arrestuar autorët e grabitjes së stacionin e gazit. Atë ditë ranë në pranga dy shqiptarët.
Hetuesit pas disa javësh hetime ranë në gjurmët e kriminelëve të tjerë të bandës duke përdorur një detektor GPS montuar në motorët TMax për të monitoruar lëvizjet e tyre. Përgjimet kanë zbardhur edhe grabitjet e kryera nga banda.
