Ish-marinari, George Mendosa, i famshëm për foton ikonike të shkrepur më 14 gusht 1945, që simbolizon fundin e Luftës së Dytë Botërore ka ndërruar jetë në moshën 95-vjeçare.
Në foton e famshme shfaqet marinari, George Mendosa, dhe infermierja, Greta Friedman, të cilët hynë në histori me puthjen e tyre në Times Square. Fotografi Alfred Eisenstaedt, i ndodhur aty krejt rastësisht, fiksoi me aparatin e tij çastin e pavdekshëm.
Greta Friedman ishte një ndihmësdentiste 21-vjeçare, kur u mbërthye dhe u puth nga marinari krejtësisht i huaj për të, teksa i gjithë qyteti po festonte fitoren ndaj Japonisë. Greta Friedman u nda nga jeta në moshën 92-vjeçare nga pneumonia.
Për herë të parë pas puthjes së famshme, George dhe Greta, u takuan në vitin 2012, ku ishin të ftuar në një program televiziv që theu rekorde shikueshmërie. Në atë kohë George sqaroi se e puthi Gretën vetëm nga entuziazmi i lajmit të lumtur dhe pas një gotë alkool.
Në nder të fotos së pavdekshme në sheshin Time Square është vendosur një statujë 7.6 metra e lartë, ku çiftet por dhe njerëz të panjohur rikrijojnë puthjen e famshme. /E.M
