Në gjysmën e dytë të gushtit, Durrësi ka përjetuar një fluks të lartë vizitorësh, jo vetëm në bregdet, por edhe në sitet arkeologjike dhe historike të qytetit.
Amfiteatri, Torra Veneciane, Hamami mesjetar, si dhe monumente të tjera të kulturës, po vizitohen çdo ditë nga turistë vendas e të huaj.
“Ne kemi pasur një fluks shumë të madh vizitorësh, jo vetëm në kullën veneciane të qytetit të Durrësit, po në të gjitha monumentet”, tha Ina Aljazi, specialiste pranë Qendrës Muzeore Durrës.
Vetëm në Torrën Veneciane, një nga pikat më tërheqëse të qytetit, mbi 6 mijë vizitorë kanë hyrë gjatë këtij viti, duke treguar interesin e madh që zgjon trashëgimia kulturore e Durrësit.
“Vizitorët kanë qenë të vendeve të ndryshme. Dominojnë vizitorët nga Evropa perëndimore, Evropa lindore, duke përfshirë polakët, italianët, anglezët”, shtoi Aljazi.
Shumë prej vizitorëve thonë se, përveç detit, bukuria e qytetit dhe mikpritja i shtyjnë të mendojnë për t’u rikthyer sërish.
“Është hera e parë që vi në Durrës. Është një vend shumë i bukur, shumë i këndshëm. Kam vizituar plazhin dhe mendoj që do të rikthehemi sërish këtu.”
“Që prej dy ditësh jam në Durrës, ndërsa në Shqipëri prej 7 ditësh. Kam vizituar Tiranën dhe Beratin, dhe nesër ikim në Bari. Është një qytet shumë i bukur.”
“Jemi nga Parisi. Është dita e parë në Durrës. Është një vend i bukur, na pëlqen.”
Tv Klan
