Edhe pse i kritikuar për shtrëngimin e dorës që i bëri pak ditë më parë kryebashkiakut Erion Veliaj, në një projekt vetjak artistik bashkiak, Eljan Tanini, një nga aktivistët e njohur për kundërshtinën e tij ndaj ndërtimit të këndit të lojrave për fëmijë në brendësi të Parkut Kombëtar të Liqenit Artificial, ka qenë aty sërish sot për të vazhduar protestën e tij ndaj projektit që sipas tij në thelb ka betonizimin.
I vetëm, i fundit i padorëzuar midis shumë bashkëshoqëruesve të dorëzuar, Tanini ka protestuar në mënyrën e tij nëpërmjet një pankarte ku shkruante “Shkruaje historinë me pemën që sjell dhe jo me betonin që mbjell”
I kontaktuar nga Opinion.al. Tanini është shprehur se: “Duhet ta duash këtë vend. Njerëzit harrojnë se të reagosh dhe të shtrëngosh duart do të thotë të mendosh diçka më shumë se kaq. Të bësh një sakrificë nga vetja duke i lënë të gjitha. Unë nuk mund të bëhem Show i radhës. Parku me beton ka pasur shumë mbështetës, pro dhe kundër. Uroj shumë që njerëzit të kuptojnë, të reagojnë, të veprojnë dhe të mos i kërkojnë të gjitha prej meje apo një grupi që proteston kundër betonit në fund të ditës dhe në fillim të natës. Nga përdhunimet kanë lindur fëmijë të bukur që më pas janë pranuar. Tani e gjeni vetë se kush është përdhunuesi dhe fëmija.
I pyetur nëse ndihet i vetmuar në përfundim kësaj proteste, ku për hir të së vërtetës triumfoi këmbëngulja e kryetarit të Bashkisë Erion Veliaj, Tanini u përgjigj se: “Koha ka për ta treguar sa e fortë do jetë shoqëria civile ose më saktë qytetarët e angazhuar. Grupet dhe individët duhet të marrin përsipër sakrificat, ndryshe nuk zgjohen dëshirat për reagime.
Po, e shoh vetminë. Është besnike çdo ditë me hijen time
Shqiptarët para se të presin vazhdimin e betejës sonë apo edhe timen duhet të fillojnë të veprojnë. Nuk mund të më kërkojnë mua apo edhe të tjerëve pse nuk dalim për këtë dhe atë. Unë nuk jam militant”, u shpreh Tanini.
