Është firmosur urdhër-arresti për kandidatin e koalicionit “Bashkë Fitojmë” për bashkinë e Himarës, Fredi Beleri.
Ai u ndalua gjatë orëve të mbrëmjes nga policia, pasi akuzohet për shit-blerje të votave. Arrestimi i tij ka sill reagime të forta politike brenda dhe jashtë vendit.
Greqia ka kërkuar sqarime për arrestimin e Belerit, i cili së fundmi ka qenë në qendër të akuzave të kryeministrit Edi Rama për deklaratën e bërë në mediat greke lidhur me helenizimin e Himarës.
Së bashku me Belerin u ndaluan edhe 3 persona të tjerë që ndodheshin në ambientet e lokalit.
Të shoqëruar në komisariatin e Vlorës së bashku me Fredi Belerin kanë qenë edhe 3 persona të tjerë, avokati i tij, një anëtar i Shtabit elektoral dhe një tjetër.
Shoqëruesi i Belerit, Pano Kokoveshi është vënë në pranga për korrupsion në zgjedhje në bashkëpunim. Ndërkohë, janë thirrur për t’u marrë në pyetje disa banorë të Himarës.
Ndalimi është bërë pak pas mesnate, rreth orës 00:15 nga policia teksa ishte në restorantin e tij. Beleri dhe 3 të tjerët janë dërguar në ambientet e Drejtorisë Vendore të Policisë së Vlorës. Ai është marrë në pyetje në Komisariatin e Vlorës. Mësohet se ndalimi i Fredi Belerit është bërë pas një hetimi të prokurorisë së këtij qyteti, konkretisht i prokurorit Anton Pali, pasi kishte indicie për sa i përket veprimeve të Belerit dhe anëtarëve të stafit të tij. Është e paqartë ende nëse kanë qenë autoritetet e Vlorës që kanë bërë vëzhgime dhe përgjime sa i takon dyshimeve për shitblerje vote apo jo. E paqartë është gjithashtu nëse ka qenë prokuroria ajo që ka dhënë urdhrin për ndalimin. Belerit ende nuk i është komunikuar nëse do të jetë në arrest apo jo, për ta paraqitur më pas në gjykatë.
Në videon e publikuar në media, duket që Beleri po qëndron me disa persona në lokalin e tij në shëtitoren e Himarës kur efektivë të Policisë së Shtetit e arrestojnë. Në operacion kanë marrë pjesë Forcat ‘Shqiponja’ por edhe ato të FNSH. Në pamje duken 6-7 forca policie që i marrin me shpejtësi personat, ndoshta edhe për të shmangur ndonjë incident apo irritim me mbështetës të Belerit. Për momentin çështja po hetohet nga policia dhe prokuroria e Vlorës. Nëse do të ketë elementë të korrupsionit në zgjedhje, për shitblerje të votës, çështja pritet që t’i kalojë Prokurorisë së Posaçme SPAK në Tiranë.
Mbrëmë pas mesnate, në ambientet para komisariatit të Himarës janë mbledhur një grup simpatizantësh, ndërkohë që ka qenë i pranishëm edhe Vangjel Dule, kreu i PBDNJ, partia në koalicion me Berisha-Meta që e ka propozuar kandidatin Beleri. Në një prononcim për mediat Dule e ka quajtur sulm të pastër politik arrestimin e Fredi Belerit dhe bën thirrje që të tilla tentative për pengimin e procesit elektoral të ndalen veprime të tilla. Sipas Dules shoqërimi i sotëm i Belerit orkestruar enkas nga kryeministri Rama.
