Presidenti i FIFA-s, Gianni Infantino ka deklaruar sot se futbolli mund të mos marrë më pjesë në Lojërat Olimpike dhe se turneu olimpik i zhvilluar dy javë më parë në Brazil mund të jetë i fundit për këtë sport. FIFA po mendon të heqë sportin e futbollit nga Olimpiada, pas ankesave të shumta që kanë klubet për lojtarët që marrin pjesë në Lojërat Olimpike me kombëtaret, duke neglizhuar ekipet ku luajnë. “Ky turne zhvillohet në një periudhë delikate për futbollistët, të cilët, ose përgatiten për sezonin e ri ose kampionatet kanë nisur”, tha Infantino, duke iu referuar ankesave të klubeve.
Shumë ekipe nuk i lejuan futbollistët e tyre që të marrin në Lojërat Olimpike “Rio 2016”, aq sa disa kombëtare olimpike u bënë gati në momentet e fundit, me lojtarë të dorës së dytë. Në një intervistë për të përditshmen zvicerane “Blick”, Infantino tha: “Pjesëmarrja e futbollistëve të moshës U-23 dhe disa lojtarëve mbi këtë moshë në Olimpiadë nuk është një zgjidhje që kënaq të gjithë. Nuk është “as mish, as peshk”. Do të flasim me IOC për ta zgjidhur këtë ngërç”, tha sot presidenti i FIFA-s.
Më tej, numri 1 i futbollit botëror u ankua për Olimpiadën, duke thënë: “Është një turne që fryn artificialisht kalendarin e ndeshjeve të një sezoni futbollistik”. Duket se ky problem ekziston vetëm te meshkujt, ku xhirojnë miliarda euro në nivel klubesh, ndërsa për futbollin e femrave nuk ka asnjë problem në lidhje me Lojërat Olimpike. Vetë Infantino pranoi se së shpejti do të ulet të bisedojë me Thomas Bach, presidenti i Komitetit Olimpik Ndërkombëtar, por ka gjasa që futbolli të mos jetë në Lojërat Olimpike të vitit 2020, që zhvillohen në Tokio (Japoni).
