Qëndrimi i të dërguarit të Presidentit Trump për misione të posaçme, Richard Grenell, lidhur me mbajtjen e Hashim Thaçit dhe 3 luftëtarëve të tjerë padrejtësisht në burgun e Hagës nuk është qëndrim i ri.
Gazetari Blendi Fevziu thotë se e ka artikuluar më parë dhe në studion e tij dhe është një qëndrim i drejtë në raport me faktet që tregojnë se është një proces kryekëput politik.
“Besoj që Grenelli i qëndron një ideje të shprehur dhe më herët, e ka shprehur dhe në emisionin Opinion kur ka qenë i ftuar, që burgosja e Hashim Thaçit ka pasur prapavijë të zhvillimeve të brendshme politike në SHBA dhe jo një problem që lidhej me drejtësinë apo me një çështje të ngritur fillimisht nga Këshilli i Europës”.
Por duke u nisur nga qëndrimi i Grenellit, a mundet që SHBA të ndërhyjë për të zhbërë këtë padrejtësi për ish-Presidentin Thaçi, Kadri Veselin, Jakup Krasniqin dhe Rexhep Selimin?
“U nis nga një gjyqtar amerikan që ka pasur probleme dhe me Presidentin Trump. Akuza e Dik Martin mbi të cilën u bazua, nuk ekziston më.”
“Akuza është ngritur nga një prokuror amerikan, Jack Smith, i cili është akuzuar drejtpërdrejt nga Presidenti Donald Trump si një person i përfshirë në proceset politike kundër Presidentit Trump. Nga ana tjetër, duhet thënë një gjë, që aktakuza kundër Hashim Thaçit është ngritur pas një pretendimi të Dick Martit në KiE që lidhej me trafikun e organeve. Ndërsa sot pasi u ngrit kjo Gjykatë e Posaçme nuk ka asnjë akuzë të ngritur nga prokuroria për trafikun e organeve, por ka çështje të tjera. Përderisa akuza ishte për trafikun e organeve dhe asnjë detaj i vetëm i trafikut të organeve nuk është në aktakuzë, tregon që çështja është e dështuar që në fillim”.
Pavarësisht kush i drejton aktualisht institucionet e Prishtinës, Fevziu mendon se ky proces gjyqësor ndaj 4 ish-luftëtarëve të UÇK-së lidhet direkt me luftën e Kosovës, ndaj duhet vlerësuar si çështje kombëtare.
“Çështja e 4 liderëve të UÇK-së dhe çështja e luftës së shqiptarëve të Kosovës nuk duhet të lidhet me politikën e momentit dhe as me situatën e momentit. Është shumë më e madhe se sa momenti dhe lidhet me trashëgiminë dhe dinjitetin e shqiptarëve”.
Për deklaratën e Grenell reagoi një ditë më parë dhe Kryeministri Rama, sipas të cilit, sa më shumë të vazhdojë kjo padrejtësi, aq më e madhe është njolla në organin ndërkombëtar të drejtësisë.
Tv Klan
