Me rastin e festave të fund vitit shumë nga figurat e njohur dhe kompanitë e mëdha në treg kanë ardhur në ndihmë të familjeve nëpërmjet dhuratave dhe ushqimeve me qëllim bërjen e festave edhe më të ngrohta. Nga kjo nuk ka bërë përjashtim as Alpha Bank.
Ditën e sotme Alpha Bank Albania dhuroi paketa ushqimore për 250 familje në të gjithë Shqipërinë, në bashkëpunim me Bashkitë më të mëdha në vend. Banka shpërndau ndihma të shportës bazë të konsumit dhe disa pije freskuese, për një sezon festiv sa më të gëzueshëm për këto familje.
Në fjalën e tij përshëndetëse z. Periklis Drougkas, Drejtor i Përgjithshëm i Alpha Bank Albania tha: “Festat e fundvitit janë një periudhë e veçantë të cilat na sjellin më afër familjes dhe miqve tanë; Jemi sot këtu sepse duam t’ju japim dashurinë e familjes Alpha Bank, nëpërmjet këtyre dhuratave të Krishtlindjeve, ne synojmë t’ju sjellim ju dhe familjes tuaj Festa më të gëzueshme. Jam krenar të them se, aktualisht, 200 paketa të tjera janë duke u shpërndarë nga skuadra Alpha Bank në familje në të gjithë Shqipërinë, me qëllimin e vetëm e shpërndarjes së gëzimit dhe dashurisë.”
I pranishëm në këtë aktivitet ishte edhe Erion Veliaj, Kryetari i Bashkisë Tiranë, i cili vlerësoi dhe theksoi rëndësinë dhe kontributin e Alpha Bank Albania në projekte të rëndësishme të ndërmarra prej saj./opinion.al
