Një festë me muzikë live, në të cilën janë thyer të gjitha rregullat anticovid. Është kjo një video e publikuar në Facebook, nga ish-Ministri i Shëndetësisë Ilir Beqaj.
Pa dhënë detaje se ku është filmuar videoja në fjalë, Beqaj thotë se ajo është regjistruar një natë më parë.
Sikurse shihet në video, në një ambjent të mbyllur ka një numër shumë të madh qytetarësh dhe ndërsa këngëtarja këndon live, një grup vajzash janë duke kërcyer.
Ish-ministri e cilëson pa dyshim një thyerje të ligjit këtë festë, ndërsa e cilëson fyes serbesllëkun me të cilin kjo shkelje ligji bëhet në mes të Tiranës.
“Ndjesë çdo vajze apo djali, gruaje apo burri, që mund t’i kem cënuar privatësinë duke bërë publike këto pamje se si janë argëtuar mbrëme. Por janë në moshë madhore dhe janë të vetdijshëm për shkallën e (mos)zbatimit të ligjit. Cënimi i rregullave të caktuara për ruajtjen shëndetit nga kërcënimi i Sars-Cov-2 është moralisht i papranueshëm dhe ligjërisht i dënueshëm. Për më tepër, “serbesllëku” i shkeljes së ligjit në qendër të Tiranës është ofendues për këdo që zbaton ligjin”, shkruan Beqaj.
Kujtojmë se për shkak të situatës Covid, në Shqipëri është e ndaluar hapja e bareve dhe lokale pas orës 22:00 dhe gjithashtu grumbullimet janë të ndaluara/Opinion.al
