Eksperti kryesor për sëmundjet infektive në SHBA, Anthony Fauci, deklaroi se nuk pret që vaksina e koronavirusit të bëhet e detyrueshme për të gjithë amerikanët.
“Unë nuk mendoj se do të shihni ndonjëherë masën e detyrimit për vaksinim, veçanërisht për publikun e gjerë”, tha Fauci gjatë një forumi të mbajtur online.
“Nëse dikush refuzon vaksinën, atëherë nuk ka asgjë që mund të bësh për këtë. Ju nuk mund ta detyroni askënd të marrë një vaksinë”, tha ai.
Komentet e tij bien ndesh me ato të kryeministrit australian, Scott Morrison, i cili më herët tha se ai dëshiron që vaksina ndaj koronavirusit, të bëhet e detyrueshme “aq sa është e mundur” për të gjithë australianët.
Sakaq, sipas Organizatës Botërore të Shëndetësisë, 25 vaksina janë aktualisht duke kaluar në prova klinike dhe më shumë se 100 janë duke u zhvilluar në të gjithë botën.
Dy fazat e para të testimit përfshijnë një grup më të kufizuar njerëzish, por faza e tretë e testimit përfshin miliona njerëz dhe procesi zgjat për disa muaj, thotë OBSH-ja, e cila ka kërkuar nga të gjitha kompanitë dhe shtetet që t’i përmbahen udhëzimeve për prodhimin e vaksinave të sigurta dhe efektive./Opinion.al
