Kryeministri Edi Rama ka reaguar nëpërmjet një postimi në rrjetet sociale pas takimit me emigrantët shqiptarë në Athinë.
Ai ka falënderuar pjesëmarrësit, ndërsa shton se ata që u derdhën lumë në stadiumin “Galatsi”, u bënë shëmbëlltyra e një zemre gjigande shqiptare që rrahu anembanë shtetit fqinj.
Ndër të tjera, Rama shkruan se Shqipëria me bijtë dhe bijat e saj shfaqi dëshirën e fortë për të hapur një kapitull të ri vëllazërimi me Greqinë.
“FALEMINDERIT NGA ZEMRA
*Para nisjes për Tiranë nga Athina, pas përjetimit në çdo qelizë të frymës së thellë të atdheut mes shqiptarëve të Greqisë dhe me ndjenjën më të hatashme të mirënjohjes, për të gjithë ata që u derdhën lumë drejt Stadiumit Galatsi, ku u bënë shembëlltyra e një zemre gjigande shqiptare, që rrahu anembanë vendit fqinj, duke e shfaqur sot Shqipërinë me të gjithë krenarinë legjitime të bijve e bijave të saj dhe me dëshirën e fortë për të hapur, sipas porosisë së Naimit tonë një kapitull të ri vëllazërimi, rendi europian e paqeje me prosperitet me Greqinë, ku realiteti i ri që ka krijuar afirmimi qytetar i shqiptarëve të Greqisë, si edhe realiteti i afirmuar i grekëve të Shqipërisë, na e ka vënë mu përpara syve ftesën e urtë për ta parë të shkuarën përmes të ardhmes, e jo më anasjelltas, nëse duam bashkarisht që më në fund, Shqipëria dhe Greqia të bëjnë për popujt e tyre, atë që popujt e tyre kanë bërë për njëri-tjetrin përgjatë historisë”,-shkruan Rama në “Facebook”.
