Mediat italiane, mbi të gjitha ato lokale, pranë skuadrës nga Bergamo kanë vlerësuar me superlativa debutimin e portierit të Kombëtares së Shqipërisë, Etrit Berisha, me skuadrën e tij të re, Atalantën, pavarësisht disfatës së thellë me rezultatin final 3-0, të pësuar përballë Cagliarit. I transferuar në formën e huazimit vetëm pak ditë më parë nga Lazio, portieri i përfaqësueses së Shqipërisë u aktivizua sot si titullar në ndeshjen e vlefshme për javën e 4-t të Seria A. Në shkrimin e post ndeshjes, “Bergamopost.it” nuk është kursyer aspak në qortimin e futbollistëve të Atalanës, duke shpëtuar në vlerësimin e saj vetëm portierin shqiptar.
“Shpëtohet Berisha, ndërkohë që mbahen Gomez e Kessie, ndërsa sa i përket të tjerëve, në shtëpinë e Atalantës është errësirë e thellë. Janë të shumta paraqitjet negative mes futbollistëve zikaltër, në një disfatë që mund të kishte qenë edhe më e thellë se rezultati final 3-0. Debutim i mrekullueshëm për Berishën me skuadrën e Atalantës dhe është padyshim më i miri në fushë. Nuk mund të bënte asgjë në rastin e golit të Borriellos, por është i mrekullueshëm në rastin e minutës së 34’ ndaj Sau, sikurse dhe ndaj Borriellos në të 39’. Edhe në pjesën e dytë ndaj Joao Pedros në të 54’ ka shpëtuar portën, por e ka të pamundur të bëjë ndonjë gjë në momentin e devijimit të topit nga ana e Sau. Shpëton sërish në minutën e 71’ përballë Sau, por dorëzohet ndaj Borriellos në të 74’, ndonëse meriton gjithsesi trofeun e më të mirit”, vlerëson media italiane
Burimi:© telesport.al
