Një operacion mbarë Europian i mbështetur nga EUROPOL ka shkatërruar një rrjet trafikimi të të miturve për shfrytëzim seksual, lypje të detyruar dhe shfrytëzim të punës. Operacioni, i udhëhequr nga Mbretëria e Bashkuar, përfshinte autoritetet e zbatimit të ligjit nga 15 shtete anëtare të BE-së, Islanda dhe Zvicra.
Midis 17 dhe 23 qershor 2019 janë kontrolluar mbi 127 000 individë, 63 800 automjete dhe 1 100 prona. Autoritetet e zbatimit të ligjit kontrolluan pronat private, ndërmarrjet tregtare, hotelet, autobusët dhe stacionet e trenave, portet e trageteve, aeroportet dhe vendkalimet kufitare. Fushatat parandaluese në shkolla për të informuar të miturit për rreziqet e trafikimit të qenieve njerëzore ishin gjithashtu pjesë e aktiviteteve operative.
Rezultatet e përgjithshme përfshijnë 34 arrestime për trafikim të qënieve njerëzore dhe 36 arrestime për vepra të tjera të tilla si grabitje, shpërndarje të materialit të shfrytëzimit seksual të fëmijëve dhe lehtësim të imigracionit të paligjshëm. Gjatë ditëve të aksionit, u identifikuan 206 viktima të mundshme, 53 prej të cilave u konfirmuan se ishin të mitur. Këto aktivitete mundësuan nisjen e 31 proceseve të reja kundër trafikimit njerëzor në vendet e ndryshme pjesëmarrëse.
Gjatë operacionit, ekspertë në trafikimin e qenieve njerëzore nga agjencitë e zbatimit të ligjit, oficerët e mbrojtjes së fëmijëve, punonjësit social, përfaqësuesit e bashkive dhe organizatat joqeveritare iu bashkuan përpjekjeve për të identifikuar viktimat e mundshme dhe për të hetuar rastet e trafikimit të fëmijëve.
Europol lehtësoi shkëmbimin e informacionit midis vendeve pjesëmarrëse dhe analizoi informacionet operacionale me burimet e dhënave të tyre.
* Vendet e mëposhtme morën pjesë në operacion: Austri, Bullgari, Kroaci, Gjermani, Hungari, Islandë, Letoni, Lituania, Holanda, Portugalia, Rumania, Sllovakia, Sllovenia, Spanja, Suedia, Zvicra dhe Mbretëria e Bashkuar. /Opinion.al
