Hera e parë e Erza Muqollit në Shqipëri dhe në një skenë të saj, ishte te “Virtuozët”, në mbrëmjen e së Dielës.
Me Inva Mulën ajo këndoi “La Boheme” të Charles Aznavour, një nga këngët më të famshme franceze që nga krijimi, 50 vite më parë.
Ndoshta nuk iu kujtohet kjo Erza që shikoni në skenën e “Virtuozët”. E në fakt ajo është rritur. Kanë kaluar katër vite nga konkurrimi në spektaklin “France’s Got Talent”. Zëri, këndimi i krijimeve më të bukura po aq edhe të vështira vokalisht të muzikës së lehtë botërore pushtoi rrjetet sociale në atë kohë. Videot e konkurrimit të saj në spektaklin e talenteve në Francë u bën virale. Në finale Erza u vlerësua si zëri i tretë më i mirë.
Që atëherë Erza Muqolli është një emër i njohur në skenat në Francë dhe përtej saj. Në skenën shqiptare, gjithnjë dëshironte që hera e parë të ishte me Inva Mulën
E lindur në Francë nga prindër emigrantë nga Kosova, 12-vjeçarja, është pjesë e grupit “Kids United”, “Fëmijët e Bashkuar”. Ajo jep koncerte kudo, me miliona albume të shitura, që një pjesë e të ardhurave shkojnë për bamirësi.
Angazhimi i saj në muzikë e ka bërë Erzën një nga fëmijët shqiptarë më të famshëm. Nga e ftuara e Brigitte Macron, zonjës së parë të Francës, e Celine Dion në koncertin e saj, këndimi me artisten e njohur franceze ZAZ, e deri te koncerti në Kombet e Bashkuara në New York.
Zëri i Erzës u zbulua në një spektakël talenti, siç është edhe “Virtuozët” që vazhdon suksesshëm konkurrimin me talente nga kanto, baleti dhe instrumenti. Edhe dy mbrëmje dhe ai mbërrin në mbrëmjet edhe më sfiduese, ato çerekfinale. Deri atëherë shijojmë edhe një herë duetin Erza Muqolli – Inva Mula.
Tv Klan
