Presidenti i Turqisë, Rexhep Taip Erdogan i ka bërë thirrje botës islamike që të mbështesë Shqipërinë pas situatës tragjike të krijuar nga tërmeti 6.4 Rihter.
Gjatë fjalës së tij në hapjen e mbledhjes së 35-të të Komitetit të Përhershëm për Bashkëpunim Ekonomik dhe Tregtar (COMCEC) të Organizatës së Zhvillimit Islam, presidenti Erdogan bëri me dije se kishte biseduar dy herë në telefon me kryeministrin Edi Rama.
“Pas lajmit të tërmetit dje bisedova dy herë me kryeministrin e Shqipërisë, Edi Rama. I uruam të shkuara”, u shpreh Erdogan.
“Natyrisht qytetet ishin rrënuar seriozisht. Këtu neve na takon diçka, duhet të organizojmë një mbledhje të donatorëve, sepse në lidhje me ndërtesat e rrënuara mendoj se duhet të jemi pranë Shqipërisë, gjë e cila është veçanërisht detyrë e Organizatës Islame për Zhvillim. Besoj se është shumë e dobishme që të hedhim këtë hap. Kjo është një detyrë vëllazërie”, shtoi presidenti turk.
Ai iu drejtua shteteve të pranishme në konferencë duke i kërkuar të ndihmojnë Shqipërinë.
“Unë këtu nëpërmjet jush gjithë botës islame i bëj thirrje që ta mbështesë Shqipërinë”, bëri thirrje Erdogan duke shtuar se “të gjithë duhet të qëndrojmë pranë Shqipërisë qoftë në ofrimin e trajtimit mjekësor ndaj të plagosurve qoftë të atyre që shtëpitë u janë shkatërruar ose dëmtuar. Jemi në stinën e dimrit. Duhet të parashikojmë se në çfarë gjendje mund të jenë vëllezërit tanë atje në këtë stinë të ftohtë”.
Shqipëria u godit dje nga një valë tërmetesh ku më i forti ishte ai i orës 3:54 me magnitudë 6.4 Rihter. Numri i viktimave ka arritur në 29, ndërkohë që 650 persona janë të plagosur. Dëme të shumta janë regjistruar në ndërtesa, shtëpi dhe godina shërbimesh kryesisht në zonën e Durrësit, Thumanës dhe Tiranës. Mbi 45 persona u nxorën nga rrënojat e banesave dhe pallateve të shembur nga lëkundjet e forta. Dita e sotme është shpallur zi kombëtare. /Opinion.al
