“Më mungon shumë, tani pushofsh në paqe vëlla, të kam dashur gjithmonë“,-me këto fjalë të shkruara në rrjetin social “Facebook”, Orges Beqari i dha lamtumirën vëllait të tij Lorencit i cili humbi jetën në një aksident automobilistik në Itali.
Orgesi, në një prononcim për mediat italiane ka treguar se familja e tij kishte ikur në Itali me një motoskaf në vitin 1991.
“Prindërit Edoardo dhe Mariana dhe vëllezërit Lorenc dhe Gentian mbërritën në Ravenna 30 vjet më parë në vitin 1991 me një varkë të nisur nga Shqipëria. Nuk dua ta kujtoj thotë”,-thotë ai teksa flet për të vëllanë.
Orges është i prekur, tregon më shumë për vëllanë që ka ndërruar jetë:
“Ai ishte më i miri nga të gjithë, njeri i mirë. Tani ishte duke nisur një punë të re. Më parë ka punuar me vëllain tjetër Gentianin punë të ndryshme. Tani do të niste punë tjetër, ishte i lumtur. Edhe me të fejuarën e tij Sandra. Djali i saj erdhi të më takojë sot, më tha se mamaja e tij nuk është mirë. Kur mori vesh lajmin për vdekjen e Lorencit u shokua dhe ndihet e sëmurë”.
Ai kujton edhe herën e fundit që u takua me vëllain e tij:
“Të shtunën pak para se të nisej për të takuar Sandrën në Forlì, ai ishte me prindërit dhe po luante me nipin e tij. Të gjithëve do të na mungojë shumë”.
Lorenc Beqari 45 vjeç me origjinë nga Durrësi humbi kontrollin e automjetit të tij “Alfa Romeo” dhe makina doli nga rruga duke u përmbysur në Via Ravegnana./Opinion.al
