Enti Rregullator i Energjisë do të mbledh ditën e sotme bordin për të diskutuar për anulimin e fashës mbi 800kWh/muaj për energjinë.
Para mbledhjes së ERE, deputetja e Partisë Demokratike, Jorida Tabaku përmes një video-mesazhi në rrjetin social “Facebook” tha se nuk ka nevojë që çmimi i energjisë të rritet me 4 herë duke u bërë çmimi më i lartë në rajon.
Nga ana tjetër, Tabaku i bëri thirrje ERE-së që të ushtrojë funksionin e saj kushtetues dhe të mbrojë interesat e qytetarëve .Deputetja tha se qeveria i ka fondet për mos ta kthyer krizën e korrupsionit në atë të buxhetit familjar.
“Sot bordi do marrë një vendim për shtyrjen e vendimit me një muaj. Kërkresa ime qëndron e njëjtë, nuk ka nevojë për rritjen 4 herë të çmimit të enegjisë. Nuk ka nevojë që shtresa e mesme të behet shtresa më e tarifuar në Shqipëri për energjinë. Argumentet që dhashë 2 javë më parë janë ato që ERE po përdor sot për të shtyrë vendimin me 1 muaj. ERE duhet të ushtrojë funksionin e saj kushtetues dhe të mbrojë interesin e qytetarëve. Nuk ka arsye që çmimi i energjisë të bëhet më i larti në rajon. Informacionet tregojnë që qeveria i ka fondet që mos ta kthejë këtë krizë nga një krizë korrupsioni në krizë të buxhetit familjar”, tha Tabaku./Opinion.al
