Policia e Sarandës ka arrestuar sot pronarin e një hoteli në Sarandë, pasi iu gjetën 22.5 kilogramë kanabis.
Nga kontrolli i ushtruar në hotelin e Erjon Beqirit policia ka gjetur në një nga dhomat e hotelit hashashin e futur në në 3 thasë.
Sipas policisë, lënda narkotike ishte ndarë në 11 pako dhe mbështjellë me qese plastike.
Mbi 32 vjeçarin rëndon akuza e”Prodhimit dhe shitjes së lëndëve narkotike”.
Njoftimi i policisë
Policia e Sarandës në bazë të informacioneve të siguruara në rrugë operative se ky shtetas dyshohej se posedonte lëndë narkotike në hotelin e tij, menjëherë u organizua puna me qëllim kontrollin e objektit dhe kapjen e autorit.
Nga kontrolli i ushtruar në hotelin në pronësi të këtij shtetasi në lagjen nr.1 Sarandë, policia ka konstatuar në një nga dhomat e këtij hoteli një sasi me lëndë narkotike me peshë prej 22.5 kilogramë, e dyshuar e llojit Cannabis Sattiva.
Lënda narkotike ishte fshehur në 3 thasë me thurje në dollapin e një dhome, e ndarë në 11 pako dhe mbështjellë me qese plastike, e cila u sekuestrua në cilësinë e provës materiale.
Policia arrestoi në flagrancë pronarin e hotelit shtetasin E.B, për veprën penale “Prodhimi dhe shitja e lëndëve narkotike”.(Neni 283 i K.Penal).
