Dy të rinj të moshës 25 dhe 22 vjeç janë arrestuar nga policia në Tiranës, pasi akuzohen se kanë inskenuar një aksident për të përfituar dëmshpërblim.
Policia bën me dije se aksidenti ka ndodhur më datë 04 tetor të këtij viti në aksin rrugor “Valias-Tiranë”, ku shtetasi me iniciale A. K., 22 vjeç duke drejtuar automjetin tip “Benz”, ka humbur kontrollin dhe si pasojë automjeti ka dalë nga rruga.
Më pas, me qëllim përfitimin në mënyrë të padrejtë të dëmshpërblimit nga kompania e sigurimeve, 22-vjeçari nga Nikla, Armando Kallmeti, të cilit sapo i ra makina tip “Benz” në kanal nuk thirri policinë, por shokun e tij.
E kështu, bashkë me 25-vjeçarin Igli Topalli, nga Tapiza, më 4 Tetor inskenuan një histori. Ata bënë sikur ishin përplasur bashkë dhe kur kanë shkuar efektivët e policisë rrugore u kanë paraqitur të dhëna të rreme për automjetin që sigurohet.
E duket se të rinjtë kanë menduar se do përfitonin nga kjo histori. Por pas më shumë se një muaji nga dita e këtij aksidenti të pretenduar, policia i vuri në pranga.
Ata zbuluan skemën e dy të rinjve dhe si provë kanë momentin e aksidentit të të riut, kur bie në kanal.
Ndaj tyre rëndojnë dy vepra penale, “Mashtrimi në sigurime” dhe “Veprime që pengojnë zbulimin e së vërtetës”, kryer në bashkëpunim.
