Ka përfunduar ceremonia hapëse e Kupës së Botës Katar 2022, ndërsa pritet që ndeshja hapëse e edicionit të 22 të Kampionatit Botëror që do të luhet mes Katarit dhe Ekuadorit të startojë në orën 17:00.
Fjalën e fundit në ceremoninë hapëse e pati Emiri i Katarit, Tamim bin Hamad Al Thani.
Teksa iu uroi mirëseardhjen të gjithëve, Tamim bin Hamad Al Thani u shpreh se është koha që për 28 ditët e ardhshme njerëzit të ndjekin festën e madhe të futbollit, ndërsa pati dhe një thirrje për të gjithë ata.
“Ne kemi punuar shumë me kaq shumë njerëz për të krijuar një turne të suksesshëm. Ne kemi bërë të gjitha përpjekjet tona për të mirën e Njerëzimit. Dita që të gjithë kemi pritur më në fund ka ardhur: nga sot dhe për 28 ditët e ardhshme do ndiqni festën e madhe të futbollit.Njerëz të vendeve dhe racave të ndryshme do të vijnë në Katar dhe shumë të tjerë do të ndjekin nga e gjithë bota falë televizorit. Është mirë që njerëzit të lënë mënjanë atë që i ndan dhe të festojnë atë që i bashkon. Uroj të gjithë për të jetuar një kohë gëzimi dhe emocionesh, qofshin ato ditë që mund të frymëzojnë mirësi dhe shpresë. Mirë se vini dhe fat të gjithëve”, tha emiri i Katarit, Tamim bin Hamad Al Thani./Opinion.al
