Ditën e sotme Komisioni i Posaçëm i ngarkuar nga Këshilli i Lartë i Prokurorisë për vlerësimin dhe përzgjedhjen e kandidateve për SPAK, ka propozuar disa hapa për ngritjen e kësaj strukture edhe me tetë prokurorë.
Në këtë propozimin e bërë ndaj anëtarëve të KLP-së, thuhet se Struktura e Posaçme AntiKorrupsion duhet të ngrihet brenda muajit nëntor të këtij viti.
Ndërkohë, një tjetër pikë e rëndësishme është dhe koordinimi që KLP duhet të ketë me Këshillin e Lartë Gjyqësor për ngritjen e Gjykatës së Posaçme AntiKorrupsion.
“Ekzistenca e njërit organ pa tjetrin, qoftë edhe disa orëshe mund të sjellë probleme”, thuhet në propozim. Por pas këtij propozimi, anëtarët e KLP-së duhet ende që të marrin një vendim mbi propozimin e bërë nga Komisioni i Posaçëm.
Ndërkohë, Këshilli i Lartë i Prokurorisë vendosi të emërojë në detyrë 8 prokurorët që do të formojnë Strukturën e Posaçme Anti Korrupsion, edhe pse minimumi i detyrueshëm me ligj për të nisur punën kjo strukturë është 10.
“Ne si KLP nuk kemi vendimmarrje për organikën për SPAK. Vendimin për numrin dysheme e ka marrë kushtetutëbërësi. Vendimin për numrin aktual do ta marrë drejtuesi i SPAK në bashkëpunim me kuvendin. Ne nuk marrim një vendim në lidhje me organikën e Prokurorisë së Posaçme, ne thjeshtë emërojmë ata që mund të emërojmë. Ne po emërojmë prokurorët në SPAK. Ne nuk marrim një vendim për krijimin e SPAK. Mund të emërojmë tetë dhe tetë po emërojmë. Mendimi im ka qenë që ne nuk e shkelim Kushtetutën përmes emërimit”, tha kreu i KLP, Gent Ibrahimi./ Opinion.al
