Elton Ilirjani i cili pak kohë më parë në emisionin Opinion e pranoi publikisht që ishte gay, por sonte në emisionin e Rudina Magjistarit ka deklaruar se nuk beson tek martesa midis dy meshkujve apo dy femrave dhe është shprehur kundër birësimit të një fëmije.
“Nuk besoj tek martesa midis dy meshkujve gay apo dy femrave lesbike. Jam gjithashtu kunder birësimit të një fëmije nga një çift me prirje homoseksuale. Mendoj se kjo gjë nuk funksionon. Martesa dhe fëmijët janë diçka që mund ta bëjë një burrë dhe një grua, jo dy burra apo dy gra”- ka thënë Ilirjani.
Ai gjithashtu është shprehur kundër të trumpetuarit të faktit se është gay. “Jam kundër mburrjes me faktin që jemi gay dhe jemi më të mirët. E di që komuniteti do të më kundërvihet për këto që po them, por kështu e mendoj”, – ka vazhduar biznesmeni. Eltoni ka rrëfyer gjithashtu faktin se ka përjetuar në Qipro një histori dashurie, e cila zgjati 4 vjet, por që për arsye të ndryshme përfundoi.
“Kam qenë i dashuruar për 4 vjet, aktualisht nuk jam i lidhur. Në Shqipëri nuk mund ta gjej një partner, sepse njerëzit janë mendje-mbyllur, ndërsa jashtë shtetit njerëzit kanë shumë vese si alkooli, duhani apo drogra të ndryshme. Ndërsa unë kam arritur deri tek cigarja, madje edhe atë tani e pi me cigare elektrike”, – ka treguar Eltoni.
“Unë e dua jetën dhe kjo më dha motiv dhe forcë për të ecur përpara me prirjen time seksuale. Unë jam person që nuk prekem, nuk qaj kurrë, nuk më dalin lot. Kam qarë vetëm për vdekjen e babait tim”, – e ka mbyllur rrëfimin e tij biznesmeni shqiptar i cili shumë shpejt do fillojë një jetë të re në Amerikë./Opinion.al
