Këngëtarja e njohur Elsa Lila do të mbajë më datën 1 nëntor në Tiranë recitalin e saj të parë, “Finalmente Elsa”.
Recitali do të mbahet tek Pallati i Kongreseve, pikërisht në skenën nga ku nisi e gjithë karriera e saj artistike. Atë karrierë që e ka zhvilluar ndër vite mes dy vendeve, Shqipërisë dhe Italisë, ndaj dhe e ka titulluar “Finalmente Elsa”, si për të ruajtur dhe këtë urë lidhëse.
Në një konferencë për shtyp, Elsa ka treguar se titullin “Finalmente Elsa” ja ka vendosur për shkak të reagimeve të fundit që kishte publiku në rishfaqjen e saj në festivalin e RTSH-së.
“Është quajtur “Finalmente Elsa” sepse rishfaqja ime në festivalin e një viti më parë në RTSH, solli si reagime të njerëzve që thonin “O Elsa më në fund u riktheve”. Ndaj s’mund ta quaja ndryshe koncertin tim, veçse kështu”, tha ajo.
Këngëtarja theksoi se kryefjala e këtij recitali do të jetë muzika dhe miqësia.
“Muzika që unë bëj dhe zëri që unë kam, janë mjetet më të forta, përmes së cilave unë mund të shprehem ashtu si dua. Kryefjala e këtij recitali do të jetë muzika dhe miqësia. Të gjithë ato që do të marrin pjesë në këtë projekt, duke filluar nga muzikantët që kanë ardhur nga Italia dhe deri tek organizatorët, Red Cloud, po e bëjnë më shumë dashuri këtë koncert, për mua dhe për muzikën time”, ka shpjeguar Elsa Lila, në fjalën e saj duke shtuar më tej se edhe pse nuk ka qenë shumë e pranishme në skenat shqiptare, ajo s’ka rreshtur kurrë së bëri muzikë e projekte artistike.
Ajo bën me dije se asnjëherë nuk ka ndaluar së prodhuari muzikë pasi për të muzika është jetë.
“Muzika vdes me njeriun jo me karrierën. Zhdukja apo ridukja tregon që unë e bëj për pasion muzikën e jo me llogari. Në momente që nuk kam qenë prezente e kam ndjerë të domosdoshme të mos shfaqesha, por kjo nuk do të thotë se nuk kam kënduar apo bërë muzikë. Do të ndaloj se bëri muzikë vetëm kur të vdes, muzika është jetë.”
E pyetur nga gazetarët nëse do të kthehet ndonjëherë për të qëndruar gjithmonë në Shqipëri, Lila ka sqaruar se nuk mund të kthehej dot për shkak të vajzës së vogël.
“Nuk mundem të transferohem në Shqipëri për arsye familjare. Unë ende jetoj midis Shqipërisë dhe Italisë por kam një vajzë të vogël, Evita që ende shkon në shkollë atje”, shtoi Elsa.
Pjesë e ekipit të “Finalmente Elsa” do të jenë disa artistë të sukseshëm në botën muzikore italiane e jo vetëm: Enrico Melozzi dirigjent, Nicola Costa kitarist, Reberto Gallinelli basist, Lele Melotti, baterist dhe Alberto Barsi, kitarist. Pjesë e grupit janë edhe Donato Sensini, saksofonist, Guido Della Gatta, kitarist dhe Clauidio Storniolo, pianist, gjithashtu me një karrierë të sukseshme muzikore./Opinion.al
