Të dielën luhet “El Classico”, e cila përball jo vetëm Real Madridin me Barcelonën, por edhye Ronaldon me Messin. Alfonso, ish-sulmuesi i Real Madridit dhe Barcelonës, e ka cilësuar supersfidën e së dielës si duelin e Cristiano Ronaldos kundër Lionel Messit. Liderët e La Liga (“Los Blancos”) kryesojnë kampionatin spanjoll me një avantazh prej tri pikësh mbi kampionët në fuqi, ndërkohë që kanë edhe një ndeshje të prapambetur, në dorë. Skuadra e Zinedine Zidane u ngroh psikologjikisht nga kualifikimi për në gjysmëfinale të Ligës së Kampioneve, në kurriz të bavarezëve, ndërsa ajo e Luis Enrique u eliminua prej Juventusit. Ndaj Bayern Muncih, Cristiano Ronaldo goditi me një “hat-trick”, në çerekfinalen e kthimit, pas dopietës në “Allianz Arena”, duke u bërë lojtari i parë që shënon 100 gola në këtë kompeticion.
Messi ka qenë në formë të frikshme, pavarësisht rezultateve të papërfunduara të Barcelonës. Ylli Argjentinas ka grumbulluar 45 gola dhe 17 asiste në vetëm 44 ndeshje të luajtura prej tij, në të gjitha garat. Abonso, i cili fitoi La Liga-n me Real Madridin në sezonin 1994-1995 dhe pastaj kaloi dy vite në “Camp Nou”, më vonë, në karrierën e tij, beson se kjo ndeshje do të ngërthejë veç të tjerash Ronaldon me Messin, për supremacinë personale. Ai i tha “Omnisport”: “Sot, “El Classico” mund të shikohet kudo në botë. Në kohën time nuk ishte kështu. Futbolli është zhvilluar në çdo mënyrë. Në krye të kësaj loje keni lojtarë si Lionel Messi dhe Cristiano Ronaldo, të gjithë duan t’i shohin ata duke luajtur kundër njëri-tjetrit. Nuk është vetëm Real Madridi kundrejt Barcelonës, por edhe Ronaldo kundër Messit”. Ndërkohë, në grafikun shoqërues të këtij shkrimi keni mundësinë të njiheni me shifrat (statistikat) e dy yjeve të La Liga-s në ndeshjet “El Classico”, ku ata kanë marrë pjesë.
