Detaje te reja janë zbardhur nga ngjarja e ndodhur ditë më parë në Athinë, ku u ekzekutua me armë zjarri 32-vjeçari shqiptar Roan Brahimi.
32-vjeçari i cili prej disa kohësh kishte jetuar në Dubai, por që ka lëvizur dhe në disa shtete të tjera, kishte zbarkuar në Greqi të shtunën e 4 majit, në prag të Pashkëve.
Partnerja e tij ka deklaruar për mediat greke se nuk ishte në dijeni që ai do të vinte, vetëm kur i ishte shfaqur në Kishë, për të parë atë dhe fëmijën e tij.
“Nuk dija asgjë, nuk më kishte thënë gjë. Erdhi të Shtunën e Madhe për Pashkë”, është shprehur partnerja e Brahimit.
Në lidhje me ngjarjen ajo u shpreh se ishte e pranishme në makinë por nuk mbante mend sesi ndodhi.
Ndërkohë ka bërë me dije se fëmija i mitur i ndodhur në makinë ka parë të gjithë ngjarjen.
“Isha bashkë me të brenda në makinë, por nuk e mbaj mend si ndodhi. Pastaj dola nga makina. Fëmija i pa të gjitha. Tani e ka mamaja ime, unë jetoj në shtëpinë time. Nuk jam fare mirë”, shtoi ajo.
