Policia njoftoi të shtunën e 14 Qershorit se ekstradoi nga Zimbabvet drejt Shqipërisë 42-vjeçarin Loren Dusha.
Ndaj tij ekziston një masë sigurie nga Gjykata Kundër Korrupsionit dhe Krimit të Organizuar për çështjen e inceneratorit të Fierit.
“Në cilësinë e administratorit të një kompanie private, ka përfituar fonde publike në mënyrë të paligjshme, përmes faturave dhe pagesave fiktive, për punë dhe shërbime të pakryera”, njoftoi policia.
Dusha ka qenë administrator i kompanisë së inceneratorit të Fierit.
Më 23 shtator të vitit 2023, GJKKO vendosi dënimin e tij me katër vite e tetë muaj burg si pasojë e gjykimit të shkurtuar.
Mirëpo një vit më vonë, Gjykata e Posaçme e Apelit ktheu për rigjykim dosjen për inceneratorin e Fierit me një trupë tjetër gjykuese, duke prishur në këtë mënyrë vendimin e Shkallës së PArë.
Hetimet për inceneratorin e Fierit u mbyllën në Dhjetor 2022. Sipas SPAK për inceneratorin e Fierit u paguan 4 milionë Euro për punë që nuk u kryen asnjëherë, ndërsa 60 milionë Lekë është dëmi i shkaktuar në buxhetin e shtetit në skemën e mashtrimit.
Të gjithë të akuzuarit i mohuan akuzat e SPAK dhe kërkuan pafajësi në të dyja shkallët e gjyqësorit./tvklan.al
