Është ekstraduar sot në Tiranë nga Londra Martin Kaza, 46 vjeç nga Mirdita. Ai është dënuar në mungesë pasi në vitin 1997 ka vrarë dy vëllezër në Kurbin. Prej 20 vitesh Kaza ka qenë në arrati. Ai ka jetuar në Londër me identitet të rremë ku ka krijuar familje dhe ka tre fëmijë.
Lajmi për ekstradimin e tij për të vuajtur dënimin në Shqipëri e dha Policia e Shtetit. Në një njoftin për mediat, policia tha se “Kaza është dënuar me 22 vite burg për veprat penale ”Vrasja me paramendim, e kryer në bashkëpunim” si dhe “Armëmbajtje pa leje”.
Në vitin 1997 Martin Kaza ka vrarë për hakmarrje në qytetin e Laçit dy vëllezërit Gjini, të cilët kanë qenë autorët e dyshuar të vrasjes se vëllait të tij në vitin 1995 në Mirditë.
Historia e plotë e hakmarrjes dhe arratisë së Kazës
Martin Kaza u arrestua në muajin Qershor të vitit 2016. Ai jetonte në Britani të Madhe që prej vitit 2001. Disa vite pasi vrau vëllezërit Agustin dhe Dod Gjini, 46-vjeçari u arratis drejt Anglisë me identitet të rremë për të kërkuar azil, duke pretenduar se ishte refugjat lufte nga Kosova.
Pasi mbërriti në Britani, në vitin 2008 Kaza u martua me zonjën Majlinda Dule. Martin Kaza është baba i tre fëmijëve të lindur në Britani të Madhe. Ai bënte punë të ndryshme në restorante, lavazhe dhe punonte në ndërtim.
Pas arrestimit të tij nga autoritetet angleze me qëllim ekstradimin në Shqipëri, avokati i 46-vjeçarit apeloi çështjen në Gjykatën e Lartë angleze. Procesi gjyqësor për ekstradimin e tij drejt vendit tonë zgjati 10 muaj. Gjatë seancave gjyqësore, Kaza ishte shprehur se ekstradimi i tij nga Anglia ku kishte punuar për 18 vite, shkelte të drejtat e njeriut dhe ishte i pajustifikuar.
Po ashtu, ai i tregoi gjykatës se për t’iu shmangur familjes Gjini me të cilën ishte në hasmëri, pasi në 1994 ata i kishin vrarë vëllain Ndue Kaza, oficer policie, ai ishte fshehur në Greqi.
Martin Kaza, si pjesë të mbrojtjes për të shmangur ekstradimin i tregoi gjykatës se e kishin goditur 4 herë me thikë dhe kishte përfunduar në koma pasi ishte dëbuar nga Greqia. Megjithatë, gjykata angleze nuk u bind nga argumentimet e Martin Kazës dhe vendosi ekstradimin e tij për të vuajtur dënimin në Shqipëri.
