Prokuroria Themelore në Prizren ka njoftuar rihapjen e hetimeve për vdekjen e ish-aktivistit të Vetëvendosjes Astrit Dehari.
Vendimi u mor pas publikimit të konkluzioneve të ekspertizës së Institutit të Mjekësisë Ligjore në Lozanë të Zvicrës, ku thuhet se dyshimet paraprake për vetëvrasje “nuk duken shumë të vërteta”.
Dehari mbahej në Qendrën e Paraburgimit në Prizren, si i dyshuar për sulmin ndaj ndërtesës së Kuvendit, në gusht të vitit 2016 dhe u pretendua se kishte kryer vetëvrasje më 5 nëntor 2016 prej bllokimit të rrugëve të sipërme të frymëmarrjes, të vet shkaktuara, të cilat kanë qenë të shoqëruara me gjakderdhje të jashtme.
Ky pretendim nuk u pranua nga Lëvizja Vetëvendosje dhe familja e 26-vjeçarit.
Prokuroria thotë se do të dëgjojë ekspertët e Institutit të Mjekësisë Ligjore në Lozanë, si dhe ekspertët e Institutit të Mjekësisë Ligjore në Kosovë, për sqarimin e raporteve të tyre dhe nëse është e domosdoshme “do të bëhet një super-ekspertizë jashtë vendit në bashkëpunim dhe koordinim me partnerët ndërkombëtarë në mënyrë që të sqarohen rrethanat dhe shkaktarët e vdekjes”.
Prokurori i Shtetit siguron familjen Dehari dhe opinionin publik se në bazë të kompetencave dhe autorizimeve kushtetuese dhe ligjore do të zhvillojë hetime profesionale deri në zbardhjen e plotë të këtij rasti. /Opinion.al
