Kompania Microsoft në Japoni ka thënë se shitjet i janë rritur me gati 40 për qind gjatë një eksperimenti, në të cilën stafi ka punuar katër ditë në javë me pagë të plotë.
Zyrat janë mbyllur çdo të premte të muajit gusht të këtij viti dhe stafit me orar të plotë i është dhënë “pushim i veçantë”, i cili është paguar.
Microsoft po ashtu ka treguar se energjia elektrike është shfrytëzuar 23% më pak dhe 59% më pak letra janë printuar gjatë kësaj periudhe, krahasuar me gushtin e vitit të kaluar.
Pavarësisht se Japonia njihet si një nga vendet me oraret më të gjata të punës në botë, ky eksperiment tregoi se metoda e ndjekur deri më tani me shumë gjasa është e gabuar.
Më 2017, një sondazh ka gjetur se gati çereku i kompanive japoneze kanë pasur të punësuar që kanë ndenjur më shumë se 80 orë jashtë orarit brenda një muaji, kryesisht orë të papaguara./Opinion.al
